‘అదిగో కుటుంబం!’ అని ఈ దేశంలో ఏ కుటుంబాన్నయినా చూపవచ్చు. ‘కాదూ. అది కులం!’ అని ఈ గడ్డ మీద అంటే ఒప్పుకుని తీరాల్సిందే. కుటుంబం విశ్వరూపం కులం; కులం హ్రస్వ రూపం కుటుంబం. ‘ఇదే గ్రామం’ అని ఇక్కడి ఏ పల్లెనయినా చూపవచ్చు. ‘ఓహో! కులాన్ని గ్రామమని కూడా అంటారా?’ అనే ఎదురు ప్రశ్న వస్తుంది. కులం భౌగోళిక రూపం గ్రామం. రాచరికం, సైనిక స్వామ్యం, ప్రజాస్వామ్యం, ఆస్వామ్యం, ఈ స్వామ్యం అంటాం కానీ, ఇవేమీ నిజం కాదు. ఈ దేశంలో ఒక్కటే నిజం. అదే వర్ణ స్వామ్యం. కాబట్టే ‘మీదే రాజకీయ పార్టీ?’ అని అనడగండి. ‘కులం’ పేరు చెబుతారు. పోనీ ఏ పత్రిక చదువుతారు అని ఆరా తీయండి. మళ్ళీ ‘కులం’ అనే సమాధానం. పోనీ ‘ఎవరి సినిమా చూస్తారు?’ అని అడగండి. అప్పుడూ కులమే వస్తుంది. కులానికో పార్టీ. కులానికో మీడియా. కులానికో స్టార్‌. ఇలా ఒక్కొక్క రంగం గుట్టునూ విప్పుకుంటూ మూడు దశాబ్దాల (1990-2022) కుల రాజకీయాలను చెప్పారు ప్రముఖ పత్రికా సంపాదకులు సతీష్‌ చందర్‌. అదే ఈ ‘సి ఫర్‌ క్యాస్ట్‌’. సివిల్‌ సర్వీసెస్‌, గ్రూప్‌-1లకూ, ఆ స్థాయి పరీక్షలకు సంసిధ్ధమవుతున్న వారికీ, సాంఘికోద్యమకారులకూ, పరిశోధకులకూ, ఎన్నికల్లో పోటీ చేయాలనుకున్న ఔత్సాహికులకూ, రాజకీయ విశ్లేషకులకూ, చరిత్ర, సామాజిక, రాజనీతి శాస్త్ర విద్యార్థులకూ, పరిశోధకులకూ, అధ్యాపకులకూ అనునిత్యమూ అధార పడ దగ్గ పుస్తకం. పాత్రికేయులకూ, రాజకీయ విద్యార్థులకూ అయితే నిజంగానే ఒక పాఠ్య గ్రంథం. సతీష్‌ చందర్‌ ప్రసిధ్ధ పత్రికా సంపాదకులు, కవి, వ్యంగ్య రచయిత, కథకులు, విమర్శకులు, నవలా రచయిత, మీడియా బోధకులు, టీవీ హోస్ట్‌, రాజకీయ విశ్లేషకులు. ‘వార్త’ దినపత్రిక సహవ్యవస్థాపక సంపాదకునిగానూ, ‘ఆంధ్రప్రభ’ దినపత్రిక ప్రధాన సంపాదకునిగానూ పని చేశారు. ఇంతవరకూ ఆయన 25 గ్రంథాలను వెలువరించారు.
